30 İyul – Beynəlxalq Dostluq Günü münasibətilə DOST İnklüziv İnkişaf və Yaradıcılıq Mərkəzi, “Birgə və Sağlam” İctimai Birliyinin ortaq təşəbbüsü ilə “Biz mehriban ailəyik!” adlı konsert proqramı təşkil olunub.

Paytaxtın ilk inklüziv kafesi – “Kaşalata”da baş tutan tədbirdə hər iki qurumun rəhbər şəxsləri, yaradıcı heyəti iştirak ediblər.

“Birgə və sağlam” İctimai Birliyinin təsisçisi və sədri, “Kaşalata” kafenin həmtəsisçisi Aytən Eynalova kafenin yaranma məqsədi və fəaliyyəti barədə məlumat verib. Cəmiyyətdə bərabərliyin təşviqi baxımından belə məkanların vacibliyini vurğulayıb.

Daha sonra çıxış edən DOST İnklüziv İnkişaf və Yaradıcılıq Mərkəzinin direktoru Elnarə Ənsari tədbirin əhəmiyyətindən danışaraq, Mərkəzin həssas əhali qruplarından olan şəxslərin yaradıcılıq imkanlarının genişləndirilməsi istiqamətində gördüyü işlərə toxunub. O, bu kimi layihələrin davamlı olacağını qeyd edib.

Konsertdə DOST İnklüziv İnkişaf və Yaradıcılıq Mərkəzinin təlimçi və benefisiarları ilə “Birgə və Sağlam” İctimai Birliyinin üzvləri səhnə bölüşüblər. Tamaşaçılara həm Azərbaycan milli musiqisinin inciləri, həm də dünya klassikasından seçmələr, poeziya nümunələri təqdim edilib.

Həssas qruplardan olan şəxslərin ifaları “Kaşalata” kafenin qonaqları tərəfindən maraqla qarşılanıb.