Ümummilli lider Heydər Əliyevin 100 illik yubileyinə həsr edilmiş “Şərq nağılı” əlilliyi olan gənclərin beynəlxalq yaradıcılıq festivalının iştirakçıları Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzinin qonağı olub. Mərkəzin direktoru Nigar Məmmədova təlim istiqamətləri, həyata keçirilən layihələr, qısa müddətdə əldə edilən uğurlarla bağlı qonaqlara məlumat verib. Qeyd olunub ki, Birinci vitse-prezident Mehriban xanım Əliyevanın təşəbbüsü ilə yaradılan Mərkəzdə həssas əhali qruplarından olan şəxslərin yaradıcılıq potensialının inkişaf etdirilməsi, onların cəmiyyətə inteqrasiyası istiqamətində müxtəlif sosial layihələr icra olunur. Bildirilib ki, burada əlilliyi olan şəxslər, şəhid ailəsi üzvləri, valideyn himayəsindən məhrum və ya valideynini itirmiş uşaqlar və digər həssas kateqoriyalar üçün əlverişli mühit mövcuddur. Gənclər və İdman Nazirliyi, MDB iştirakçı dövlətlərin Dövlətlərarası Humanitar Əməkdaşlıq Fondunun dəstəyi ilə ölkəmizə gələn qonaqlar Mərkəzin müxtəlif xidmət istiqamətləri üzrə yaradıcılıq studiyalarında iş prosesini izləyiblər. Sonda Mərkəzin təlimçi və benefisiarları ilə festival iştirakçılarının ifalarından ibarət konsert proqramı təqdim olunub.