Beynəlxalq Pensiya və Sosial Fondlar Assosiasiyası ilə Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondunun birgə təşkilatçılığı ilə keçirilən beynəlxalq konfransın iştirakçıları DOST İnklüziv İnkişaf və Yaradıcılıq Mərkəzində olublar. Beynəlxalq təşkilatların, Serbiya, Özbəkistan, Qırğızıstan, Qazaxıstan, Belarus və Tacikistandan sosial təminat qurumlarının nümayəndələri Nazirliyin tabeliyində olan Mərkəzin fəaliyyəti barədə məlumatlandırılıblar.

Mərkəzin direktoru Elnarə Ənsari xidmət istiqamətləri, eyni zamanda cəmiyyətdə inklüzivliyin təşviqi ilə bağlı görülmüş işlərdən danışıb, qonaqları təlim studiyaları və xidmət istiqamətləri ilə tanış edib.

Qeyd olunub ki, 2021-ci ildən fəaliyyət göstərən DOST İnklüziv İnkişaf və Yaradıcılıq Mərkəzi Birinci vitse-prezident Mehriban xanım Əliyevanın təşəbbüsü ilə yaradılıb. Burada həssas qruplardan olan şəxslərin incəsənət vasitəsilə sosial adaptasiyası və cəmiyyətə uyğunlaşması prosesi aparılır. Həmin yaradıcı şəxslər peşə vərdişlərini təkmilləşdirməklə yanaşı, eyni məkanda sosial psixoloji dəstək xidmətlərindən də yararlana bilirlər. Mərkəz üzvlərinin beynəlxalq yarışlar və müsabiqələrdə, habelə sərgilərdə uğurla təmsil olunduğu, əldə edilən nəticələr diqqətə çatdırılıb.

Qonaqlara Mərkəzin İsmayıllıdakı “DOST Evi” filialı, Bərdədə Qarabağ Regional DOST Mərkəzində yerləşən Qarabağ “DOST Evi” şöbəsinin fəaliyyəti barədə də məlumat verilib. Həssas qruplara aid istedadlı şəxslərin tanıdılması, inklüziv cəmiyyətin inkişafına dəstək məqsədi ilə bölgələrdə həyata keçirilən tədbirlərin əhəmiyyəti vurğulanıb.

Konfrans iştirakçılarına Musiqi istiqaməti üzrə təlimlərə cəlb olunmuş təlimçi və benefisiarların ifasında proqram təqdim olunub. Həmçinin qonaqlar təlim prosesini izləyib, Mərkəzin müxtəlif peşə-yaradıcılıq otaq və studiyalarında hazırlanmış əl işlərindən ibarət sərgiyə baxıblar.