DOST İnklüziv İnkişaf və Yaradıcılıq Mərkəzinin Qarabağ “DOST Evi”şöbəsinin müdiri Kamran Kamranlı Vətən müharibəsi zamanı Suqovuşan qəsəbəsinin azadlığı uğrunda gedən döyüşlərdə şəhidlik zirvəsinə ucalan Azər Həsənovun ailəsini ziyarət edib.

Ziyarət zamanı qəhrəman şəhidin şücaətindən, vətənə bağlılığından söhbət açılıb. Qeyd olunub ki, Azər Həsənov 2014-cü ildən Azərbaycan Silahlı Qüvvələrinin sıralarında müddətdən artıq həqiqi hərbi xidmət qulluqçusu idi. Vəzifə borcunu şərəflə yerinə yetirdiyi üçün Prezident İlham Əliyevin Sərəncamlarına əsasən "Vətən uğrunda", "Cəsur döyüşçü", "Suqovuşanın azad olunmasına görə" medalları ilə təltif edilib.

Görüşdə şəhid ailələrinə göstərilən dövlət qayğısı, sosial dəstək tədbirlərindən danışılıb. Bildirilib ki, onların yadigarları hər birimiz üçün dəyərlidir, xatirələri hər zaman əzizdir. Şəhid Azər Həsənovun yadigarı olan qız övladı hazırda  Qarabağ “DOST Evi” şöbəsində təsviri incəsənət və kulinariya istiqamətləri üzrə təlimlərə cəlb olunub.