DOST İnklüziv İnkişaf və Yaradıcılıq Mərkəzinin benefisiarları Bakı Kitab Mərkəzinə ekskursiya edib. Həssas əhali qruplarından olan uşaq və yeniyetmələr paytaxtın ən böyük kitab mərkəzinin fəaliyyəti ilə tanış olub, müxtəlif oxu guşələrini gəziblər.  Məlumat verilib ki, Mərkəzin kitab fondunda doğma dilimizlə yanaşı,  rus, türk, ingilis, fransız, alman, ərəb və digər dillərdə istənilən janrlarda nəşrlər tapmaq mümkündür. Bakı Kitab Mərkəzinin direktoru Günel Rzayeva Heydər Əliyev Fondunun təşəbbüsü və dəstəyi ilə yaradılmış bu məkanda kitaba və mütaliəyə marağın artırılması üçün həyata keçirilən layihələrdən danışıb. Qeyd olunub ki, Mərkəzdə hər yaş qrupuna aid oxucular üçün müxtəlif aktivitələr mövcuddur. Burda bütün oxucular öz zövqünə və marağına uyğun guşədə asudə vaxtını səmərəli keçirə bilər. Mərkəzin oxu zalında təşkil olunan qiraət saatında benefisiarlara “Dünya nağılları-2” toplusundan hissələr oxunub. Xatırladaq ki, DOST İnklüziv İnkişaf və Yaradıcılıq Mərkəzinin benefisiarları üçün mütəmadi olaraq şəhərimizin tarixi və görməli məkanlarına ekskursiyalar təşkil olunur. Ekskursiyaların məqsədi Mərkəzdə təlimlərə cəlb olunmuş həssas kateqoriyalardan  olan uşaq və yeniyetmələrin dünyagörüşünün artırılması, estetik zövqünün formalaşdırılmasıdır.